Real Madrid Oo Go’aan Ka Gaartay Sida Ay Ugu Dabaaldegi Doonto Hanashada Horyaalka La Liga Habeenka Khamiista
July 14, 2020  Balaleti
Haddii Real Madrid ay ku guuleysato horyaalka La Liga habeenka Khamiista, maamulka caasimada Spain ayaa durbaba ka sii fekerayo sida ay u maareyn lahaayeen dabaaldegyada iyadoo cabsida Korona Fayras ay weli taagan tahay.
Caadiyan taageerayaasha Real Madrid waxay isagu soo baxaan goobta lagu magacaabo ee Cibeles Fountain si ay ugu dabaaldegaan koobabkooda, iyadoo ciyaartoyda xitaa ay ka qeyb qaataan dabaaldega.
Si kastaba, madaxada kooxda Real Madrid ayaa doonaya inay ka fogaadaan xaalad kasta oo halis gelineysa caafimaadka taageerayaasha sidaasi darteed sannadkan wax dabaaldeg ah kuma qabsan doonaan Cibeles.
Taas bedelkeeda, dabaaldeg la soo agaasimay ayay waqti danbe ku qaban doonaan garoonka Santaigo Bernabeu marka taageerayaasha loo ogolaado garoomada.
Maamulka dowlada hoose ayaa xitaa ka shaqeynaya inay boliis badan geeyaan goobta u asteysan dabaaldegyada ee magaalada Madrid si aysan taageerayaal badan isagu soo bixin habeenka Khamiis ama habeenka Axada, si looga fogaado sidii ay sameeyeen taageerayaasha kooxda Cadiz markii ay xaqiijisteen u soo bixitaankooda horyaalka La Liga.
“Faldan ha ku dabaaldegina Cibeles” ayuu duqa magaalada Madrid oo lagu magacaabo Jose Luis Martinez Almeida yiri.
“Taas bedelkeeda ku dabaaldega inaad calamada Real Madrid surataan guryihiina.”
Wasiirka caafimaadka Spain Salvador Illa ayaa isna ka hadlay suurtogalnimada dabaaldega ay sameyn doonaan taageerayaasha Real Madrid.
“Waxaan aragnay sawiro badan oo na walwal geliyay oo ay sameeyeen kooxaha u soo dalacay La Liga” ayuu yiri.
“Waxyaabo badan ayaan sameyn karnaa waqtigaan, waan bashaali karnaa laakiin waa inaynan ixtiraamdarro u muujinin fayraska.
“Waa qasab inaynu raacno tilmaamaha caafimaadka”