Askari ka tirsanaa ciidamada Booliska Kenya oo lagu soo eedeeyay inuu toogasho ku dilay nin ka mid ah wadayaasha mootada ama dhugdhugleyda ee magaalada Nairob 19-kii bishii Febraayo ee sannadkaan ayaa ayaa lagu sii daayay lacag damaanad ah.
Garsooraha Sare ee maxkamada Makadara Heston Nyaga ayaa sii daayay Mr. Zadock Ochuka Oyieka ka dib markii laga qaaday damiin lacageed oo gaareysa hal milyan oo shilinka Kenya iyadoo Maxkamaddu ku amartay sarkaalka inuusan soo faragalin marqaatiyaasha iyo baaritaanka.
Sidoo kale Garsooraha ayaa Mr. Oyieka amar ku siiyay inuusan tagin goobta uu dhibaatada ka geystay ee isbitaalka Mama Lucy iyo inuusan la xiriirin markhaatiyaal.
Agaasinka dambi Baarista ee DCI-da qeybteyda Kayole ayaa doonayay in la dheereeyo haynta dambiilaha balse qareenka Mr Oyieka, Nick Cumari ayaa ka soo horjeestay arrintaasi.
Askarigan dilka macno darada ah geystay ayaa lagu amray inuu xaadiro xafiiska dambi barista qeybta Kayole Talaado walba ilaa iyo 16-ka Maarso ee sannadkan oo ah xiliga dacwadiisa la furi doono.