Abiy: “Waxaa bilowday wejigii u dambeeyay ee hawlgalka

Dagaalka Tigray

Qoraalka sawirka,Kumannaan qof ayaa la sheegay inay ku dhinteen dagaalka Tigray

Ra’iisal wasaaraha Itoobiya, Abiy Axmed, ayaa shaaciyay inuu bilowday wejigii u dambeeyay ee duulaanka ay ciidamada Federaalka ku hayaan gobolka Tigray, kadib markii ay dhammaatay 72 saac oo uu u qabtay inay isku soo dhibaan TPLF.

Waxa uu ugu baaqay shacabka ku nool magaalada Mekelle inay guryahooda ku sugnaadaan, maadaama la filayo in dagaal culus oo halkaa ka dhaco.

“72 saac ee la soo dhaafay, waxaa isa soo dhiibay kumannaan ka tirsan ciidamada gaarka ah ee Tigray, maleeshiyaadka u dagaallamaya iyo dhalinyaro badan oo arkay dhagarta ay wadaan TPLF,” ayaa lagu sheegay qoraal ka soo baxay xafiiska ra’iisal wasaaraha.

Farriintaas ayaa lagu sheegay in ciidamada Itoobiya ay intii karaankooda ah ilaalin doonaan noolasha dadka rayidka ah ee lagu qiyaasay nus milyanka qof ee ku nool Mekelle.

Taangiyada iyo hubka kale ee culus ee milateriga Itoobiya ayaa la filayaa inay galaan magaaladaas xarunta u ah taliska TPLF ee dagaalka kula jira xukuumadda Addis Ababa.

Xaqiijinta sheegashada dhinacyada dagaallamaya ayaa aad u adag, maadaama ay xaddidan yihiin wararka la heli karo, halka telefoonnada iyo internet-kana ay go’an yihiin.

Dhex-dhexaadinta

Waxaa Addis Ababa gaaray ergo ka socota Midowga Afrika oo loo xilsaaray inay ka shaqeeyeen sidii loo joojin lahaa colaadda Tigray.

Saddexdan mas’uul ayaa kale ah: Madaxweynihii hore ee Mozambique, Joaquim Chissano, Ellen Johnson Sirleaf oo hogaamin jirtay Liberia iyo Kgalema Motlanthe oo muddo kooban madaxweyne ka ahaa Koonfur Afrika.

Abiy
Qoraalka sawirka,Abiy Axmed

Ergadan ayaa la filayaa inay kulan la qaataan ra’iisal wasaare Abiy si loo soo afjaro colaaddan todobaadkii afaraad gashay.

Xukuumadda Addis Ababa ayaa horay u qaadacday dedaallo lagu dhex-dhexaadinayo Federaalka iyo maamulka Tigray.

Wefdigan ayaan loo oggolaan doonin inay gaaraan Mekelle, sida uu sheegay lataliye ka tirsan xafiiska Abiy, waxaana laga dursugayaa sida ay xiisadda u qaboojin karaan.

BBC : XG